Vitar

Svalvogavegur er 49 kílómetra langur vegkafli sem liggur á milli Dýrafjarðar og Arnarfjarðar. Leiðin er torfær og erfið yfirferðar á köflum. Á stórum kafla þá þarf að fylgja sjávarhæð því þegar fellur að er vegurinn undir sjávarmáli. Svalvogavegur er með fallegustu leiðum á Íslandi til þess að keyra. Það er ekki hægt að keyra veginn nema vera á fjórhjóladrifnum bíl en best er þó að hjóla leiðina á góðu fjallahjóli þar sem vegurinn getur verið grýttur.  Ef lofthræddir einstaklingar eru í bílnum þá er lagt til að keyrt sé út Arnarfjörð frá Hrafnseyri og sá hringur tekinn að Þingeyri. Þá snýr bíllinn alltaf að fjallshlíðinni ef svo óheppilega vill til að þú mætir bíl. Einnig getur verið skemmtilegt að útbúa hring og keyra þá leiðina um Kvennaskarð og keyra framhjá hæsta fjalli Vestfjarða á leiðinni.

Árið 1919 var reistur á Straumnesi, norðanvert við mynni Aðalvíkur, 20 m hár járngrindarviti en strand Goðafoss undir Grænuhlíð árið 1916 flýtti fyrir því að reistur var viti á Straumnesi. Árið 1930 var járngrindin orðin illa farin og um hana var sett steypa. Árið 1993 var hann rafvæddur með sólarorku og árið 1995 var sett upp sjálfvirk veðurathugunarstöð. Vitinn er 23,3 m hár. Hönnuðir eru Thorvald Krabbe, Sigurður Thoroddsen, Benedikt Jónasson og Axel Sveinsson verkfræðingar. 

Viti var fyrst byggður á Látrabjargi árið 1913 en árið 1948 var nýr viti byggður. Var í honum gasljósatæki þar til hann var rafvæddur með orku frá ljósavélum. Árið 1985 var veiturafmagn tekið inn en sjálfvirk ljósavél sér fyrir varaorku ef straumrof verður. Sjálfvirk veðurathugunarstöð var tekin í notkun árið 1995. Vitinn er 5,9 m hár. Hönnuðir eru Axel Sveinsson verkfræðingur og Einar Stefánsson húsateiknari.  

Ólafsviti í Patreksfirði er viti sem byggður var árið 1943 og tekinn í notkun árið 1947. Vitinn er 14,4 m hár steinsteyptur turn.  Hann er byggður eftir teikningum Axels Sveinssonar verkfræðings. Gasljós var í vitanum til árisns 1978 en þá var hann rafvæddur.

Æðeyjarviti í Ísafjarðardjúpi var byggður árið 1944 en ekki tekinn í notkun fyrr en 1949. Hann er steinsteyptur og er 12,8 m hár. Hönnuður er Axel Sveinsson verkfræðingur.  Gömul gasljóstæki voru sett í hann til þess að byrja með en ný tæki voru sett upp árið 1951. Vitinn var rafvæddur árið 1988 og gasljóstæki fjarlægð. 

Vitinn er byggður árið 1937 á Óshólum undir Óshrynu, yst í Óshlíð, innan við Bolungarvík. Hann er 6,4 m hár og steinsteyptur. Hönnuður er Benedikt Jónasson verkfræðingur.  Vitinn var rafvæddur árið 1964 en gas haft til vara til ársins 1995 en þá var gasbúnaður fjarlægður og hans stað settir rafgeymar sem tengdir eru við varaperu. 

Klofningsviti er á skerinu Klofningi vestan við Flatey á Breiðafirði. Hann var byggður árið 1926. Hann var lýstur með gasljósatæki þar til hann var rafvæddur með sólarorku árið 1991. Vitinn er 9,3 m hár. Hönnuður er Benedikt Jónasson verkfræðingur.